كل سنة و انتم دايما حلوينيييين بمناسبة عيد الفطر – بلاش المبارك بما إننا المفروض حزب معارض- بس أحب أولا أنبه لحاجة و هي إنكم ما تاكلوش من البيتى فور اللي عليه سكر ده كتير عشان دكتور الدايت بتاعي قاللي إنه بيتخن موووووووووووووووت و فيه كالوريز بالهبل… ده موضوع فاتنستي حبيت أنبه عليه في الأول… بس مش عارفه ليه العيد لونه مش حلو السنة دي.. بيقولوا فيه تحرش بالبنات داون تاون و حاجات بيئة موت كدة و الناس كلها في موود وحش أوي و زعلانين… طيب يعني ينفع يعملوا كدة في وقت زي ده؟؟؟ قبل ما فالانتينو ينزل كوليكشن الشتا عشان نعرف نعمل مظاهرة محترمة و الجو بدأ يبرد؟؟ طب نعمل إيه إحنا؟؟ أنا بصراحة عملت اللي قدرت عليه و كلمت مكتب فالانتينو في إيطاليا عشان يشوفوا صرفة في الموضوع ده و الاسيستانت بتاعته أكدت لي إنها هاتتصرف بشكل أو بآخر عشان نلحق نعمل حاجة… أما مؤقتا فا لو سمحتوا ما حدش ينزل وسط البلد من غير قصافة أو مبرد في شنطتها.. يعني إحنا مش ناقصين الفاتنيستات يحصل لهم كدة خالص… هتبقى حاجة مش كوول أبدا… هما فاكرين نفسهم فين؟؟ إحنا في الشارع هنا وللا إيه؟؟ إيه يعني.. كل ده عشان هيفا طلعت تقول هيك الواوا بوس الواوا؟؟ كله بيدور على الواوا عشان يبوسها.. دي مسخرة.. هما فهموا كلامها على إنه أوردر وللا إيه… طبعا هيفا فاتنيستا جدا بس إحنا لسه ما بقيناش الحزب الحاكم!! الموضوع لسه عند الحزب الوطني البيروقراطي ده و للا معرفس إسمه إيه… الناس دي واضح إن باباهم و مامتهم مسافرين و عشان كدة بيقللوا أدبهم على البنات و عارفين إن ما فيش حد هايعاقبهم أو يوقفهم في الكورنر… طب لما بابي و مامي يرجعوا؟؟ فاكرين إن إحنا مش هانقولهم؟؟ لأ هانقول… و يعملوا اللي هما عاوزينه عشان لو فاكرين إنهم ها يهددونا بتكسير محلات الميك اب زي ما عملوا في سينما مترو إحنا ولا يهمنا… فاتنيستا 009 مسافرة الأسبوع الجاي باريس و هاتجيب كل اللي نفسنا فيه و طظ فيهم… و على رأي حماقي حبيبي: أنا عمر ما حد كان زاللني أو كاسر عيني -يجنن شريط حماقي الجديد.. البنات مهبولة بيه و بيفكروا يخلوه مطرب الحزب الرسمي- و أصلا بأه الشعب ده كله أي كلام… إيه القرف ده… في الشارع! مفيش غواصة طيب يتداروا فيها؟؟؟ و كل دول؟؟ مش ممكن و أنا أقول البنات ليه بتعنس -الغير فاتنستيين طبعا بعد الشر علينا- ما هو واضح أهو ليه… عشان الشباب مطلوقين في الشارع زي البتاع ده اللي بيصارعوه في اسبانيا.. آه التور.. دي قلة أدب والله.. و أنا مش مبسوطة خالص.. و مش كووول برضه.. و هانلبس بكرة أحمر بأه بمناسبة موضوع التور ده… عشان نصارعهم… و الولاد اللي متضايقين عشان الموضوع ده – أصل في منهم صحابي- معلش… ما تزعلوش… إحنا مش هانسكت.. بس مش هاقدر أنشر صور الحادث الأليم ده عشان فاتنستات ما يستحملوش… بعدين أنا قلت و هم هايصدقوني من غير صور.. أنا برضه العضو التأسيسي.. مش حاجة جابونيز يعني.. و عشان الشباب اللي زعلانين.. طب خدوا عندكم هتافات الاحتجاج
يعني الحكومة ماهياش كافية.. حتى الشعب كمان بالعافية!ر
ماتقولش إيه اديتنا مصر.. و قول فين اديتنا مصر “معلش يا أصالة.. رغم إني لسه ما بركتلكيش على العملية اللطيفة خالص بتاعت مناخيرك.. بس اضطريت أغير شوية في الليركس بتاعة الأغنية.. عارفة إنك مش هاتزعلي عشان الأغنية أصلا مش بتاعتك”
بأة كل مرة تشوفني يبقى نفسك آ؟
Hail Mozza!
